“Araz-Naxçıvan” futbol klubunun prezidenti Ceyhun Sultanov komandasının Misli Premyer Liqasının ilk dövrəsində qələbə qazanmamasının səbəblərini şərh edib. Onun əsas göstərdiyi problem müdafiə xəttindəki səhvlərdir.
Sultanov https://sport-az.com verdiyi müsahibədə deyib ki, ilk dövrədə qalib gələ biləcəkləri oyunlar olub, ancaq komanda üstünlüyünü saxlaya bilməyib: “Öz səhvlərimiz səbəbindən ilk dövrəni qələbəsiz başa vurduq. Qapımızda çox bəsit qollar görürük”.
Onun fikrincə, buraxılan qolların ardında diqqətsizlik dayanır. Müdafiə zamanı tam diqqətli oynamadıqlarını və rəqibin bundan faydalandığını söyləyən klub rəhbəri hesab edir ki, həm qol vurub, həm də qol buraxan komandanın müdafiəsində problem var.
Sultanov səhvlərin aradan qaldırılmasının və müdafiədə oyunun yaxşılaşdırılmasının zəruriliyini vurğulayıb, bu işin məşqçilər heyətinin üzərinə düşdüyünü qeyd edib.
O, həmçinin komandadakı zədəli futbolçuların çoxluğuna diqqət çəkib: “Hazırda beş-altı oyunçumuz zədəlidir. Bu da komandaya müəyyən çətinliklər yaradır”. Sultanovun sözlərinə görə, “Araz-Naxçıvan” səviyyəsindəki klublar üçün hətta bir oyunçunun sıradan çıxması çətinlik yaradır.
Xatırladaq ki, “Araz-Naxçıvan” Misli Premyer Liqasında 11 tur keçdikdən sonra 4 xalla turnir cədvəlinin sonuncu – 12-ci pilləsindədir.
