“Qarabağ”ın qapıçısı Şahruddin Məhəmmədəliyev komandasının UEFA Çempionlar Liqasının Liqa mərhələsində “Benfika” üzərində qazandığı 3:2 hesablı tarixi səfər qələbəsindən sonra açıqlama verib. Sport-az.com-ın xəbərinə görə, futbolçu bu barədə championat.com-a danışıb.
Məhəmmədəliyev qeyd edib ki, qələbə çox böyük sevinclə qarşılanmayıb:
“Oyundan sonra klub rəhbərliyi paltardəyişmə otağına gəldi və bizi təbrik etdi. Qələbəni çox da bayram etmirdik. Təyyarə reysini qaçırmamaq üçün tez yığışdıq. Hava limanı bağlansaydı, orada gecələməli olardıq. Biz isə oyunlardan dərhal sonra yola düşməyə çalışırıq. Onsuz da heç kim yatmır, ona görə də dərhal uçmaq daha yaxşıdır”.
O əlavə edib ki, təxminən 6 saat sonra Bakıya çatdıqlarında onları çoxlu azarkeş və jurnalist qarşılayıb:
“Aeroportda çoxlu insan – jurnalistlər, azarkeşlər qarşıladı. Çox sağ olsunlar. Bu, Azərbaycan xalqı üçün böyük qələbədir. Tarixi qələbədir. Elə onlar üçün oynayırıq ki, insanlar sevinsinlər. Tarixdə ikinci dəfə Çempionlar Liqasının əsas mərhələsində oynayırıq. Keçən dəfə bütün turnir ərzində iki qol vurduq, burada isə bir oyuna üç qol vurduq və səfərdə qalib gəldik. Əsas odur ki, bununla kifayətlənməyək və bu uğuru davam etdirməyə çalışaq. Qrupdan çıxmaq barədə düşünmək çox tezdir”.
Məhəmmədəliyev baş məşqçi Qurban Qurbanovun oyundan əvvəl futbolçulara dediyi sözləri də açıqlayıb:
“Məşqçi oyundan əvvəl dedi: “Uşaqlar, bir daha Çempionlar Liqasının qrup mərhələsində, belə böyük stadionlarda oynamaq şansımız olmaya bilər”. “Benfika” 2:1 hesabı ilə qalib gələndə Qurbanov onlara “Unutmayın, bu, Çempionlar Liqasıdır. Zövq alın. Oynayın!” dedi. Və uşaqlarda alındı”.
